Tasi Mane

Tasi Mane (Tasi Timór, Indonézia: Laut Timor, Portugés: Mar do Timór, Ingles: Timor Sea) ne'e tasi nebe mak haksanak husi Oseanu Índiku, no haketak ilha Timór ho Teritoriu Norte (Ingles: Northern Territory) nasaun Austrália nian. Ilha Timór ne’e fahe ba parte rua, husi parte lorosa’e hanaran Timór Lorosa'e ho ni-nia estadu mesak nebe mak hanaran mos República Democrática de Timór Leste iha lian Portugés. Husi parte Timór Loromonu sai hanesan provinsia ida husi Repúblika Indonézia ho naran Nusa Tenggara Timor iha lian Indonézia.

Tasi Mane

Tasi Mane nia luan 480km (300 milha) hanesan ne’e, no bele taka area atu besik 610,000 km². Iha Tasi Mane nia okos depósitu minarai no gas nebe mak barak tebes no agora dadaun ne’e estadu Timór Lorosa'e ho Austrália halo hela eksplorasaun hamutuk. Maski Tasi Mane ne’e situada entre ilha Timór no nasaun Austrália, minarai no gas sira iha ne’e la pertensi ba Indonézia tanba iha deit area entre Timór Lorosa'e no Austrália nian.

Durante tinan hirak nebe mak liu ona ba, estadu Timór Lorosa'e ho Austrália hasai argumentus nebe mak manas no kroat ba malu kona ba oinsa atu fahe mina rai no gas sira nebe mak depósitu iha Tasi Mane nia okos. Ha'hu husi fulan Dezembru 2006, estadu Timór Lorosa'e hetan lukru husi eksplorasaun mina rai no gas husi Tasi Mane atu besik US$80 miloens fulan-fulan.