Meda

Meda ne'e balada Timór nian (naran sientífiku Phalanger orientalis) ne'ebé fó ezemplu ida kapaz teb-tebes ba ita ema tanba meda sira kaer sira nia oan iha kohe ida to'o sira bele moris mesak. Ema matenek harabat balada hanesan meda iha lubun ida naran marsupiál.

Distribuisaun Meda sira iha mundu tomak

Ema matenek sira hanoin katak meda uluk liu mosu iha rai Giné Foun (Nowak, 1999). Tuir sira, meda mosu iha Timor-Leste tinan barak liu ba, wainhira ema préistóriku sira husi Giné Foun deskobre nusa Timór. Akontesimentu ida ne'e hanesan akontesimentu iha nusa seluk iha rejiaun Austrolázia nian (Nowak, 1999).

Habitat

Meda timor nian moris iha ai-laran, no fatin ho ai badak barak (Nowak, 1999), maibé ita bele hetan meda sira iha natar besik ai-laran karik tamba iha natar sira bele hetan hahan bar-barak (Flannery, 1995).

Deskrisaun

Hanesan balada sira seluk iha lubun phalangeridae normalmente meda sira todan kg 2.1, meda-inan sira nia todan menus uitoan (Grizmek, 1990). Sira uza nia ikun molik atu tesi no ajuda sa’e husi fatim ida ba fatim seluk. Meda sira nia ikun bele sai boot (liu 30 cm) ka kiik (la kona 25 cm), (Grizmek, 1990). Meda aman nia ikun mutin maibe inam sira mutin ikun rohan deit. Aman nia kulit bain bain kór mahaluk. Inam sira nia kulit bela sai kór kafé. Kulit iha kabum bele sai mutin ka mahaluk naroman (Nowak, 1999). Iha Aman sira it abele hetan glândula ida iha hirus-matan (Flannery, 1995). Sira nia liman-fuan hotu hotu la hanesan, balu sai boot balu kiik. Liman-fuan hotu hotu iha liman kukun boot.Ita bele hetan susuk haat iha meda inam sira nia kohe nia laran (Nowak, 1999). Sira hotu hotu iha matan boot no nehan kanino sira naruk Sira uza sira nia nehan atu tetak hahan (Flannery, 1995).

Hahán

Sira gosta han ai tahan, ai-fuan, fini no ai-funan (Grizmek, 1990; Flannery 1995).

Ligasaun ba li'ur

Commons

Commons: Meda – Imajen sira

Referénsia

Flannery, T. (1995). Mammal of the South-West Pacific and Moluccan Islands. Chatswood, NSW: Reed Books as a part of Reed Books Australia.
Grizmek's Encyclopedia of Mammals (1990). Volume 1. New York, NY: McGraw-Hill Publishing Company
Nowak, R. (1999). Walker's Mammals of the World, 6th edition. Volume 1. Baltimore, MD: The Johns Hopkins University Press.